Ermuko Udalaren berrikuntza eta gobernu ona ebaluatzen laguntzeko prest?

Ermuko Udala Eudelek bultzatutako ELoGE bikaintasun-zigilua lortzeko proiektuaren 5. edizioan murgilduta dago. EAEko zortzi udalerrik parte hartuko dute deialdi honetan, eta horien artean dago Ermua. ELoGE Zigilu Europarra da Europako Kontseiluak (CoE) Gobernantza eta Berrikuntza Demokratikoan Bikaintasuna lortzen duten tokiko gobernuei aitortzen dien izendapen gorena.

Proiektu honen esparruan, herritarrek aukera dute berrikuntzarekin eta gobernantza onarekin lotutako udal-jarduna ebaluatzeko, webgune honen bidez gaitutako galdetegiaren bidez. Inprimakia paperean ere eskatu eta bete daiteke Abiapuntun, Udal liburutegian, Miguel Ángel Blanco kiroldegian eta Lobiano Kultur Gunean. Inkesta betetzeko epea maiatzaren 22an, asteazkena, amaituko da.

Zigilurako deialdiak hiru inkesta jasotzen ditu. Izan ere, udalerrian bizi diren pertsonen ikuspegiaz gain, hautetsien eta udal-langileen iritziak ere jasoko dira, emaitzak konparatu ahal izateko.

72 adierazle 12 printzipio ebaluatzeko

2017an, Eudel Euskadiko Udalen Elkartea Europako Kontseiluak baimendutako eskualde-plataforma bihurtu zen, Euskadiko udalerrietan ELoGE Bikaintasun Zigilua emateko. Guztira EAEko 20 udalek parte hartu dute ekimen honetan, eta horietako 12k errekonozimendu zigilua jaso dute, horien artean, Ermuak.

Edizio berri honetan, deialdian parte hartzen duten EAEko 8 udalak Europako lehenak izango dira Europako Kontseiluak berrikusi berri duen eta euskal errealitatera egokitu den autoebaluazio-tresna erabiltzen. Parte-hartzaileek, beraz, beren burua ebaluatu ahal izango dute, gobernantzaren arloko erronka nagusiak biltzen dituen tresna guztiz eguneratuarekin.

Europako hamabi printzipioak 72 adierazletan banatzen dira, udalek beren burua ebaluatu ahal izan dezaten, eta gai hauek hartzen dituzte barne: ordezkaritza eta parte-hartzea, giza eskubideen errespetua, aniztasuna eta gizarte-kohesioa, hautetsien jokabide etikoa, gardentasuna, efikazia eta efizientzia, edo berrikuntza eta iraunkortasuna sustatzea epe luzera.

Ebaluazio-prozesuak, laburbilduz, urrats hauek jarraitzen ditu:

• Udalerri bakoitza 72 adierazleetan oinarritutako tresna baten bidez autoebaluatzen da.
• Hiru inkesta desberdin jasotzen dira, udalerrian bizi diren pertsonei, hautetsiei eta udal-langileei zuzenduak, emaitzak konparatzeko.
• Idazkaritza teknikoak autoebaluazioak aztertzen ditu, eta hark egiten ditu emaitzen txostenak (banakakoak eta globalak), konfidentzialak.
• Txosten horietan oinarrituta, ELoGE Batzordeak zigilua merezi duten udalerriak zein diren erabakitzen du.