Haurren esperimentuz betetako 47 minutu, emakumea eta neska zientzialariak omentzeko

Ermuak urtero ospatzen du Emakume eta Neska Zientzialarien Nazioarteko Eguna otsailaren 11n. Egun honek gogorarazten du emakumeek eta neskatoek zeregin erabakigarria dutela komunitate zientifiko eta teknologikoetan, eta haien parte-hartzea indartu behar dela.

Ermuko Udaletik urteak daramatzagu genero arrakala murrizteko ekintzak antolatzen. Aurten, otsailaren 11 ospatzeko, 47 minutuko bideo bat osatu da, Ermuko prestakuntza zentroek eta Akerley hizkuntza akademiak prestatutako materialari esker. Elkarrizketak, esaldi bereziak eta ikasgeletan landutako hainbat esperimentu jasotzen dira bideoan, zientziara eta teknologiara gehiago hurbiltzeko asmoz, eta herriko zentroetako haurren parte-hartze handia izan du. Nabarmentzekoa da ia material guztia ingelesez eta euskaraz dagoela.

Bideoa otsailaren 11n estreinatu zen Orbe Kardinala plazan, eta bertan, eguraldi ona aprobetxatuz, jende asko hurbildu zen zientzialari txikien lana ikustera. Zientziaren eta teknologiaren arloan emakumeek eta neskek egiten duten lanari omenaldi polita.

Esperimentu sorta lerro hauen azpian eta Udalaren YouTubeko kanalean ikus daiteke.