Kirol alorrak igeriketa ikastarogileen eta barneko igerilekuko erabiltzaileen gogobetetzea neurtuko

Duela hamar egunetik sailak martxan duen inkesta bat online bete ahal izango dugu datorren igandera arte, apirilaren 2ra arte, gure balorazioak eta iruzkinak uzteko.

Inkesta hori anonimoa da, Microsoften Office paketeko Forms programarekin egina dago, eta hogei galdera ditu. Bertan, sexuaren, adinaren, ikastaroaren (2 eta 3 urte bitarteko haurrak, 1etik 6. mailara, helduen hastapena edo hobekuntza ikastaroen) inguruko datuez gain, puntualtasuna, eskolen edukia, begiralearen lana, eskuragarri dagoen materiala, balorazio orokorra, erritmoa, izena ematerakoan zuten itxaropena bete den edo ez, jarduera gomendatuko genukeen edo errepikatuko genukeen galdetzen da. Amaitzeko, hobekien baloratzen dena, hobetu beharreko alderdiak eta iradokizunak adierazteko eskatzen digu.

Dokumentua online bete dezakegu edo baita ere paperean eta eskuz idatziz erantzun; ondoren Betiondo eta San Pelaio kiroldegietako harreretan jarritako hautestontzietan utzi. Orriak gure esku dago bi instalazioetan.

Dokumentuak, amaitzeko, aldez aurretik eskerrak ematen ditu parte-hartzaileen laguntzagatik, balioespenak zerbitzua hobetzen laguntzen baitu.