Olentzero eta Mari Domingi Ermura bidean dira... Bizkaibusen!

Bizkaibusen autobus pertsonalizatu bat probintziako hogei bat udalerritan barrena dabil egunotan, herritarrei, oro har, eta haurrei, bereziki, euren Gabonetako pertsonaia gogokoenak hurbiltzeko. Gabonak Bizkaibus Tour 2023-2024 bira Ermuan izango da datorren asteazkenean, abenduak 20, eta Olentzero eta Mari Domingi ekarriko dizkigu bisitan. Horrela, jai-giroko esperientzia gogoangarria sortuko dute bertaratzen diren pertsona guztientzat.

Orbe Kardinala plazan kokatuko da bikotearen autobusa 17:30etik 20:30era. Ikazkina eta artzaina herrira iristen direnean, autobusaren alboetatik agertoki apaindu bat irekiko da, gabon kanten musikarekin eta koloretako argiekin lagunduta, Gabonetako giro magikoa sortzeko.

Plazara hurbiltzen diren haurrak autobusean sartu ahal izango dira Olentzerori eta Mari Domingiri euren eskutitzak eskura emateko. Sarbidea eskaileretatik egingo da alde batetik, eta arrapalatik bestetik, pertsona guztientzat irisgarria izan dadin. Gainera, gozokiak eta opari txikiak banatuko dira.

Bizkaibusen ekimen honek mugikortasun iraunkorra eta garraio publikoaren erabilera indartu eta sustatu nahi ditu, baita tokiko kultura eta turismoa bultzatu ere.