'Topaldia' Ermuan egingo da aurtengoan

Euskaltzaleen Topaguneak urtero ‘Topaldia’ izenburuaz antolatu ohi duen jardunaldia Ermuan gauzatuko da aurten. Jardunaldi horren helburua Euskaltzaleen mugimenduarentzako interesekoak diren gaien inguruko hausnarketa egitea da. 2001. urtetik aurrera, Topaldia ezinbesteko hitzordu bihurtu da, mugimenduko kideen formaziorako, elkartrukerako eta hausnarketarako.

Aurtengoa, esan bezala, otsailaren 1ean, osteguna, 09:00etatik 14:00etara, Ermuko Izarra Centre eraikinean izango da. Plazak mugatuak dira eta lekua erretserbatzeko aukera izango da. Ez utzi azken unera arte.

Zein gai landuko dira aurten? Eta zergatik?

Topaguneak zabaldu duen mezuak adierazten duenez “Aurtengo jardunaldirako bi gai aukeratu dira: aktibismoak eta komunitateak. Gaur egungo gizartearen ezaugarriak kontuan hartuta, euskalgintzan jarduteko egin behar dituen proposamenak askotarikoak izan beharko luketela aurreikusten dugu, eta askotarikoak izan beharko lukete ere, etorkizunean eraikiko ditugun komunitateak eta harremanak”.

Topaldia jardunaldian aurreikusitako egitaraua eta denbora banaketa ondorengoa da:

• 09:00etan: Harrera.
• 09:30etatik-09:40etara: Sarrera.
• 09:40etatik-09:55etara: Kokapena: Aktibazioaz.
• 09:55etatik-10:25etara: Plataforma.
• 10:25etatik-10:55etara: Mahai-ingurua: Euskalgintzaz eta aktibismoez: etorkizuneko erronkak eta egitekoak.
• 10:55etatik-11:20etara: Hitzaldia: Komunitategintzaz.
• 11:20etatik-11:50etara: Mahai-ingurua: Komunitategintzaz: esperientziak eta irakaspenak.
• 11:50etik-12:30etara: Atsedena.
• 12:30etatik 13:30etara: Eta guk, zer dugu egiteko?
• 13:30etatik 14:00ra: Egunaren laburpena eta ondorioak.
• 14:00etan: Bukaera.