Jolaserako txoko dibertigarriak Hiri Hezitzailearen Nazioarteko Eguna ospatzeko

Ermua Hiri Hezitzaileen Nazioarteko Sarea osatzen duten ia 500 udalerrietako bat da, eta horregatik, 2017tik, urtero bat egiten du Hiri Hezitzaileen Nazioarteko Egunarekin. Azaroaren 30a da Sareak ezarritako egun ofiziala, baina Ermuko Udalak eta Ermua Hiri Hezitzailea udal proiektuak jarduera dibertigarriz osatutako jardunaldia antolatu dute ostiral honetarako, hilak 29, arratsaldean, herritar askok bisitatu ohi duten Eibarko San Andres azokarekin bat ez egiteko.

Orbe Kardinala plazan haurrentzako eta familientzako zazpi tailer antolatu dira, 17:00etatik 19:00etara. Hauek dira espazioak:

• Mundua jango dugu sukaldaritza tailerra
• Zaintzen zaitut, zaintzen nauzu maskoten tailerra
• Dena entzuten da eskulan musikalak
• Dibertxokoa ibilgailu ekologikoekin
• Nire neurrira eraikitzen eraikuntza jokoak
• Eskuak lurrean lorezaintza tailerra
• Aurpegi eta azkazal margoketa eta maskarak, Ermua-Mallabia Hasierako Lanbide Heziketako Udal Institutuko ile-apainketa eta estetika moduluko ikasleen eskutik

Euria egiten badu, jarduera horiek guztiak Merkatu Plazara eramango dira.

Programa osoa lerro hauen azpian erantsitako dokumentuan kontsulta dezakezue.

Hiri hezitzaileak eta gizarte-eraldaketa

Hiri Hezitzailearen Nazioarteko Egunaren 2024. edizioaren leloa Hiri Hezitzailea ikaskuntzen, herritarren eta eraldaketa sozialaren laborategi gisa da. Sareak nabarmendu nahi du hiria bera ikaskuntza-gela handi bat eta esperimentazio-, bizipen- eta ezagutza-laborategi bat dela. Ikasgela horrek kaleak, plazak, parkeak eta hezkuntza-, kultura- eta kirol-ekipamenduak ditu, giza harremanak ehuntzen diren eta pertsonen, kulturen eta belaunaldien aniztasunetik ikas dezakegun topaguneak diren aldetik, bakoitza bere berezitasunekin, baina espazio berean presente daudenak.